سروریم تاج سریم عز و فریم شانلی نگاریم

.سروریم تاج سریم عز و فریم شانلی نگاریم

شرفیم شان و وقاریم

دوغری عاشق لره دنیاده گوزل سئوگلی سن سن

آرزولار باخچاسینون آللی چیچکلی گلی سن سن

سوسنی سنبلی سن سن

حشره تک باده ی عشقیندن ایچن کیمسه آییلماز

اولماسا مست قلندر آدی دنیایه یاییلماز

صف عشاقده عاشق لر آرا زبده ساییلماز

دئمیرم عاشق اولانماز

اولسادا عاشق صادق اولانماز

ساغر عشقه اوزالدان اَلینی دنیادا چوخدی

اما بیر کیمسه اورکدن ایچه بو باده نی یوخدی

بو مِیین ساغری اوخدی

هامی بو می دن ایچنمز

عاشق صادق اولانماز

بو او می دور کی بونا عشقیدی ساقی

بو او می دور کی دئیلر آدینا باده باقی

کیمدی می ایچمه ده سن تک یارادا تازه سیاقی

کیمدی سن تک چکه باشه بئله بیر جام وثاقی

ایچه بو اودلی چناقی

سن او سرمست بلا سن سنه یوخ دهرده تالی

عشق میخانه سی عالمده اولوب سنله صفالی

ای سالان غلغله عالم لره مستانه خصالی

بیر ایچیمده ائله دون ساغری خالی

ای قویان واله و حیران هامی دنیانی کمالی

عشقیوین یوخدی زوالی